社運香港

鄭立:

人地係為左衝擊社會而搞社運, 香港係為左延續社運而否定衝擊社會.

班人以為自己搞緊社運, 其實係佔據社運既話語權, 然後將佢閹割成無任何殺傷力既野.

佢追求既係純粹形式似, 所以遊完行一定係散水, 絕食永遠短過斷食減肥法, 只係想要「遊行」同「絕食」兩件事可以變成新聞, 從來個行為本身就無意義.

鍵盤戰士只係配合呢種社運既一部份, 佢地既主要用途係批鬥市民, 然後將參加呢種社運變成道德, 變成有做野, 以及唔准任何人質疑, 即使主觀同客觀上, 佢最後就係變成選舉同捐款.

更加唔好講大把鍵盤戰士係做緊議員助理或 NGO 位, 出緊公糧, 根本係選舉受益者.

本來你出糧, 你既事, 呃飯食就大把人做, 只係去到你用埋公家既地位同組織資源, 去打壓市民, 對我黎講好明顯就過晒火. 如果你為左政府份糧去攻擊同打壓其他抗爭, 特別主張「班抗爭者應該"承擔"」,

咁佢地做既野已經唔係抗爭, 而係維穩, 出緊政府糧既社運友, 攻擊自資, 自發既抗爭者, 再抹黑佢地背後有收錢或者係鬼. 呢樣係我雨傘革命甚至魚蛋革命之後最齒冷既地方.

我否定呢種社運既原因, 係佢已經腐化到徹底, 本來你遊行絕食扮下野, 滿足自己, 以為自己做左野係抗爭最前線, 人地最多當睇唔到.

但去到為左延續呢件事, 為左令自己可以繼續自稱「最前線」, 而去打壓比自己付出得多既市民呢? 佢地做既野基本上就係白雪公主個巫婆, 見有人行得前過自己, 就毒死佢. 等佢地變返第一.

你付出唔到咁多, 淨係可以遊行絕食選舉, 咁你就註定唔係抗爭代表, 變成同一直以來咁多年係七一, 無名無姓既參與者同級, 你咪接受左佢. 唔好阻頭阻勢.

旺角發生乜事, 你唔認同最多咪唔參與, 或者至少應該同情市民, 你話自己道德佢地唔道德, 又話鬼又話盛又話係陰謀, 花咁多力氣去否定市民自發既野做乜.

你見班旺角抗爭者根本好多一睇就知係明白人, 你可以話佢地薯頭薯腦, 但肯定真心, 你去質疑佢地用心, 本身就係萬惡.

你係警察你咁講我又覺得合理, 你係社運友或支持者咁講, 根本就係莫名其妙. 人地去網臺話係鬼, 搞散個運動, 你班友就信到足, 用下個死人腦諗下啦.

根本好多人係底層個生活暗無天日, 個社會惡化自然就會開始動亂, 有幾奇?